За Нас - Roosty

Кои сме ние?

Од скромните почетоци на Рекорд во 2006 до отворањето на Roosty во 2025

↓ Scroll down

1.0

Скромните почетоци на Русти датираат од Јуни, 2006та – кога на Рекорд се ре-отвори маалското кафанче во паркот на Технометал или Форум – кое фамилијарно го работевме под друго име и концепт уште во 90тите.

Тесен простор и неколку масички внатре, готвена храна за носење и мелено месо печено на жар (да, истиот рецепт во кој уживате и ден денес), ладно пиво и пријателска насмевка – тоа беше тоа. Од сезона во сезона – додававме по некоја масичка на терасата, па по некој чадор плус, го проширивме локалот со соседниот дуќан (своевремено кројачки дуќан, па Рекорд Рекордс, па продавница за украси и беџови) и почнавме да пуштаме рокенрол – иако во тоа време на луѓето им беше необично, набрзо сфатија дека Стоунси се одличен саундтрак за ќебап, пиво и добро друштво. Не многу подоцна се одлучивме да пробаме со живи свирки со бендови и од тогаш до денес, веруваме и настојуваме дека LIVE MUSIC IS KING!

Image

2.0

Како што веќе претпоставувате (или веројатно знаете) просторот на Рекорд ни стана претесен, и во 2016 решивме да го направиме следниот чекор – Рок Кафана Рустикана 2.0 на Илинденска 94. За прв пат добивме вистински дом што ќе може да ве угости и во лето и во зима, и на сонце и на дожд – нешто за кое до тогаш можевме само да сонуваме и посакуваме. Во 2.0 пораснавме – и ние како луѓе и Русти како локал. Во тие прекрасни 9 години бевме дом на еден тон свирки, прослави, специјални моменти како свадби, родендени, момачки, девојачки…и секако – два пати го дочекавме и славевме РК Вардар како европски првак.

Image

3.0

Фаст-форвард во 2025: Roosty сега е нешто што искрено не сме ни се осудиле некогаш да посакаме или сонуваме – прекрасен, широк и мултифункционален простор – со кујна, шанк, бина, звук и светло по највисоки стандарди. Место за секаков вид дружби, од семејни и деловни ручеци, до вечерни излегувања и рокенрол забава со најдобрите бендови што Скопје и околината можат да ги понудат. Летна тераса на отворено – без тенди и чадори, само звездено небо и пријатен провев во жешките, летни, скопски вечери. Игротека за најмалите да можат да уживаат во секое ваше одење на ручек/вечера без да бидат залепени за екраните на вашите мобилни.

Image

Покрај сите промени низ годините – Русти секогаш ќе се заснова на принципте кои се поставени уште долго пред нејзиното официјално отворање во 2006 – секогаш најсвежите можни состојки за вашиот оброк, секогаш избор на најдобрите пијалоци на пазарот, секогаш насмеани лица кои ве прават да се чувствувате како дома, секогаш одлична музика која го прави амбиентот препознатлив.

Иако знаеме дека е клише – сепак е вистина. Нашиот тим е нашето семејство без кое не можеме. Низ годините имало многу луѓе кои доаѓале и си оделе. Некои добри, некои не баш – но, тие што останале се ФЕНОМЕНАЛНИ! Тоа се луѓето кои се грижат секој ваш оброк да биде со истиот вкус и квалитет како и претходниот, а како и следниот пат кога ќе дојдете. Тоа се дечките и девојките кои ги гледате секој ден насмеани како ви ги носат вашите омилени пијачки и со голем дел од вас се пријатели или другари. Екипо, длабок наклон и огромно фала што сте незаменлив дел од ова лудо возење ❤️

Нашата приказна

И на крај – Русти е Русти поради вас. Секој еден од вас што ги поминал нашите порти, во било кој од трите локали, оставил белег и е заслужен за она што е Русти денес. Затоа сакаме да ги кренеме чашите високо за вас – нашите гости – кои се движечка сила на Русти, која не е веќе само кафана – туку заедница, каде секој еден од вас е добредојден како во свој дом.

Keep On Rockin’ Roosty Fam 🤘❤️

Сакаш да ја слушнеш целата Roosty приказна (барем делот до отворањето на новата) од прва рака? Погледни ја епизодата кај Бајкерот и Кросфитерот посветена на Русти.

Резервирај